Marketing post campaign analysis تحليل ما بعد اطلاق الحملة التسويقية

Marketing post campaign analysis

تحليل ما بعد اطلاق الحملة التسويقية

احم احم احم ... أولا وقبل كل شئ , انا مجرد شخص هاوي بحب التسويق ومجال البيزنيس والستارت اب , وبحاول ادور على هواية مفيدة تشغلني نوعا ما , فقررت بسبب حبي للمجال دة , وعدم خبرتي بيه فنفس الوقت , اني اجيب مقالات حلوة من ع النت متعلقة بالموضوع دة واترجمها واكتبها باسلوبي الشيق والجميل جدا وطريقتي الكارزماتيك ولغتي العامية اللطيفة , وتعتبر نوعا ما توثيق لمدى تطوري بمعرفة المجال دة ولعل أو اكيد حد ممكن يعدي يستفيد بالمعلومات دي , كفاية كدة وشكرا مقدما , نخش في الموضوع علطول.

خطوات بداية اي حملة , العصف الذهني , التخطيط , واخيرا اطلاق الحملة التسويقية , متعب بشكل مهول , ولكنه بردو بيكون تحدي للنفس وممتع وفي الآخر بتحس بإنجاز رائع على المجهود اللي انت قدمته وفخور بمشاركتك دي , خصوصا اول ما الحملة تبقى اونلاين وخلاص بتوصل للناس وانت بتبتدي تشوف ثمرة مجهودك , عموما كل حملة تسويق الكتروني لازم يجيلها وقت وتنتهي  , ومبيفضلش غير حاجة واحدة بس باقية , تحليل ما بعد اطلاق الحملة التسويقية او ما يعرف بالانجليزي “post campaign analysis” (PCA).

اي شركة , او براند , او وكالة بتنهي الموضوع بشكل مختلف تماما عن الآخر , فيه ناس بتتعمق في التفاصيل , وناس تانية بتاخد بصة اوسع وابعد , عموما , حملات التسويق الالكتروني بتكون بسيطة جدا ومباشرة , فيه ناس بتستخدم بلاتفورم او اتنين لتوصيل محتواها , وفيه ناس بتكون شاملة كل البلاتفورمز , كاتب المقالة الأصلي شايف انه من الأفضل انك تجرب وتخطأ في الحملات اللي بتركز ع التفاصيل, ليه بقى ؟ عشان بيكون قدامك الفرصة انك تتعلم قد ايه المكونات المختلفة من الكامبين اللي انت عملتها ممكن يكون غرضها مختلف تماما او تشتغل مع بعض بشكل مختلف عشان تخدم الهدف الأخير من الكامبين اللي ممكن يكون مختلف بردو من حالة لأخرى. الاسباب الرئيسية اللي كاتب المقال الاصلي شايف انها المفروض تشجعك انك تعمل حركة ال (PCA)  دي هي :

·       تفهم ايه المكونات اللي نفعت في الحملة جدا , والمكونات اللي منفعتش خالص او منفعتش اوي.

·       تتعلم ازاي الجمهور المستهدف تفاعل او تجاوب مع الحملة.

·       تراجع الفعالية النهائية لنتائج الحملة قصاد الأهداف بتاعت الحملة.

·        بتتعلم منها معاني مهمة ومفيدة بتنفعك في الحملات اللي جاية.

حملات التسويق الالكتروني بتختلف بشكل شديد من حملة لحملة , لذلك اعزائي وعزيزاتي هنتكلم في المقالة دي عن النظرة العامة اللي شايفها كاتب المقال الأصلي بالنسبة لخبرته اهم المكونات اللي تتضمنها عملية التحليل , واللي ممكن تستخدم بالنسبة لفريق التسويق الخاص بشركة او براند معين , او المناقشة في الموضوع دة مع الوكالة المختصة بالتسويق للوصول الى حل وسط يساعد الجميع.

الخطوات الرئيسية والمكونات لتحسين الحملات الالكترونية

1.   راجع استراتيجية الحملة , واهدافها.

كأولوية , مهم جدا اننا نحدد السياق و الاسلوب بخصوص ال (PCA)  كبداية هيكون مهم جدا اننا نعرف بنبذة مختصرة استراتجيات الحملة واهدافها , لازم نكون واضحين جدا بخصوص ايه الهدف الاهم والاول اللي كانت بتسعاله البراند من ورا الحملة دي , بسبب الحركة دي هيكون من السهل او الاسهل بالنسبة للمجموعة اللي بتعمل التحليل دة انها تربط النتايج اللي موجودة بالاهداف اللي كانوا عاوزين يوصلولها , عشان الداتا اللي بيجموعها تكون اكثر وضوح واهمية وليها فايدة اكبر.

بيقولك بقى كاتب المقال الأصلي , انه بدل ما تشتغل في التحليل لفترة طويلة وتقوم بوم مفاجئ العميل مرة واحدة , من الأفضل انك في مرحلة مبكرة تعمل ملخص كدة في تقرير يحدد اذا كانت الحملة ناجحة في الوصول الى اهدافها او لا او نص نص.

2.   مراجعة النهج الابداعي الخاص بالحملة.

توضيح الثيم الرئيسي او الخطوط العريضة اللي المفروض يتمشى عليها في الحملة مفيدة جدا في توضيح ازاي الحملة اتنفذت ووصلت للناس , الحركة دي بتساعد جدا الفريق اللي شغال ع التحليل لانه بيكون عنده منظور جيد يبص من خلاله للحملة دي واللي بتنفعه جدا في استخلاص النتائج.

في الفقرة دي بردو , ياسلام بقى لو يكون فيه لمحة كدة للتايم لاين الخاصة بالانشطة بتاعت الحملة دي عشان نقدر نشوف ايه اللي كان بيوصل للناس وامتى وكان بيوصل ازاي.

3.   تقسيم النتايج ع البلاتفورمز المختلفة.

من هنا بقى نقدر نبدأ نبص اكتر ع التفاصيل من حيث ازاي كل مكون من الحملة كان شغال, الجزء دة يعتبر المفضل بالنسبة لمتخصصين التسويق الالكتروني ومديرين البراندات لانه بيمكنهم من المراجعة لانه بيكون محدد اكثر بخصوص كل الانشطة اللي بتتم الكترونيا.

الجزء دة من التقرير المفروض يكون مركز على :

·       البلاتفورمز الرئيسية او المهمة.

·       الغرض من وراء كل بلاتفورم.

·       تقسيم الاداء من حيث مؤشر الأداء (kpi) و المقاييس.

لتوضيح اكثر لتلك الجزئية ازاي بتتم , اليكم الامثلة الآتية :

السوشيال ميديا

تستخدم السوشيال ميديا مبدئيا كأداة مهمة للوصول الى اكبر عدد ممكن من المستهلكين والتوعية بخصوص البراند , ولكن مهم جدا نفتكر زي ما هو معروف ان الريتش بتاع الفيسبوك العادي ( الغير مدفوع) قليل جدااا ويكاد يعتبر معدوم , لذلك هتضطر تعتمد ع الاعلانات المدفوعة بشكل أساسي.

الهدف : التعريف بالبراند

المقاييس :

·       (CPM,CPV)  او التكلفة لكل ألف ظهور , التكلفة لكل مشاهدة.

·       نسبة الوصول الى عدد المستهلكين المستهدفين: هل اعلاناتك بتوصل للمستهلكين المستهدفين فعلا ؟

·       التواتر : وقت تعرض الناس للإعلان اللي  تم تقديمه من خلال بلاتفورمز مختلفة.

·       مقياس كام في المية من الفيديوهات اتشافت في الكامبين.

·       امتى او فين الناس شاركت المحتوى بتاعك و اتفاعلت معاه بإيجابية.

·       عدد المناقشات اللي تمت بخصوص البراند بتاعك بخصوص الكامبين دي.

البحث:

استخدام البحث في الوصول للمنتج بتاعك او البراند ممكن يكون مدفوع وممكن يكون طبيعي , لكن في حالة العمل على حملة , اكيد هيتم التطرق لاستخدام البحث المدفوع لانه بيكون مستهدف اكثر وبيركز اكثر على الوصول الى الهدف من الكامبين

الهدف : مراقبة التأثير على الجمهور المستهدف وحثه على التفاعل

المقاييس:

·       Quality score :     مدى جودة وتقارب محتوى الصفحة بتاعتك بالاعلان اللي ظاهر للناس.

·       مقياس مدى جودة استخدامك لل(key words)  وجودة اعلانك بمقارنته بكام واحد ضغط على الاعلان.

·       كام مرة اعلانك اتشاف من عمليات البحث.

·       متوسط مركز اعلانك بالنسبة للاعلانات المنافسة.

·       كام واحد ضغط على اعلانك عشان يخش عندك الصفحة ينفذ برغبته فعل او (action) عندك ع الصفحة /  يتفاعل معاك بمعنى آخر.

الموقع:

موقعك بشكل او آخر هو المركز الرئيسي ودائرة الاحداث بالنسبة للحملة بتاعتك تقدر توصل فيه رسايلك المهمة و كتاباتاك الابداعية و وجهة نظرك للأمور و للعميل , بعض البراندات بتشتغل انها تطور في الكامبين بتاعتها مواقع معدة لاستقبال المستهلكين , ودة بيخليهم يتارجتوا الناس اكثر ويكونوا اكثر واكثر تحديدا بالنسبة لرسالة الكامباين .

الهدف: نخلي المستهلكين يتفاعلوا معانا

المقاييس:

·       نقيس قد ايه الكامبين نجحت في توصيل الناس للموقع هنا.

·       تقسيم ازاي الناس وصلت للموقع من خلال البلاتفورمز المختلفة.

·       مقياس كام في المية من الناس زارت الموقع ومشيت قبل ما تتفاعل مع الموقع.

·       نقيس ازاي الناس الزوار كانوا بيتفاعلوا مع الموقع , ايه الخطوات اللي بياخدوها لحد ما يوصلوا لتفاعل معين.

·       مقياس جودة الداتا اللي ممكن نجمعها من الزوار اللي دخلوا الموقع , هل هي مفيدة ؟ هل قابلة للقياس؟

4.   تحديد اهم المعطيات :

بعد النظر نظرة اعمق في ازاي كل بلاتفورم اشتغل على حدة , لازم يكون عندنا المقدرة اننا نقدر نغطي النقط الرئيسية والمعطيات المهمة في الكامبين دي . بالتعاون مع الملخص التنفيذي اللي كان في الاول "التقرير المبدئي" .

5.   توصيات للخطوات الجاية:

بالاعتماد ع الخطوة اللي فاتت في تحديد اهم المعطيات والنقاط الرئيسية بتاعت الحملة التسويقية , اخر خطوة في التقرير المفروض تكون توضيح اكثر لاهم النقاط اللي المفروض تتاخد في الحسبان الخطوات الجاية.

لازم تقارن النتيجة بالخطة اللي كانت موجودة واللي كان المفروض يتمشي عليها تجنب انك تقع في خطأ الخطوة اللي "شكلها" اتنفذت كويس , خليك متأكد , يا اما نجحت يا فشلت.

لازم تتعلم ازاي ممكن تغير من خطوات التنفيذ ,مثلا باضافة بلاتفورم انت مكنتش حاطتها ف الحسبان او تشيل بلاتفورم من الحسبان مكانتش عاملة نتيجة كويسة او اعادة هيكلة لاستخدام بلاتفورم معين.

في التقرير لازم تبين ايه الدروس اللي استفدتها من الحملة التسويقية دي , وايه الحاجات اللي لازم تكررها تاني في المستقبل وايه النجاحات وايه الفشل اللي تعرضتله وايه المكونات اللي محتاجة تجربة اكثر واختبار اكثر واعادة تعديل وتحسين.

بس كدة وشكرا , لو عاوز تدردش معايا شوية في الكومنتات او تقولي رأيك او لو استفدت حاجة لو ممتن ليا لو متضايق مني :D قولي بس في الكومنتات

 المقالة الأصلية